პენტაგონის ახალი „დოსიე“: რას (არ) გვიყვება ამოუცნობი მფრინავი ობიექტების გასაჯაროებული არქივი

პენტაგონმა პირობა შეასრულა და ამოუცნობი მფრინავი ობიექტების (UFO) შესახებ გასაიდუმლოებული ფაილების მეორე ნაწილი ოფიციალურად გამოაქვეყნა. 64 დოკუმენტისგან შემდგარმა ახალმა კოლექციამ „ხსოვნის დღის“ (Memorial Day) დასვენებების წინ ინტერნეტსივრცეში შეთქმულების თეორიებისა და ვარაუდების ახალი ტალღა უკვე ააგორა.

ტრამპის ადმინისტრაციის მიერ ინიცირებული UAP (ამოუცნობი ანომალიური მოვლენები) პროგრამა მიზნად ისახავს, ერთხელ და სამუდამოდ დააკმაყოფილოს საზოგადოების ამოუწურავი ინტერესი დედამიწაზე არამიწიერი სიცოცხლის არსებობის შესახებ. პირველი, 161-ფაილიანი არქივი 8 მაისს გამოქვეყნდა, ახლა კი საქმეში კიდევ უფრო მეტი მასალა ჩაერთო.

აშშ-ის ომის მდივანი, პიტ ჰეგსეტი, ამ მოვლენას ისტორიულს უწოდებს:

„ომის დეპარტამენტი პრეზიდენტ ტრამპთან ერთად უპრეცედენტო გამჭვირვალობას უზრუნველყოფს. ფაილები, რომლებიც აქამდე გრიფით „საიდუმლო“ ინახებოდა და სამართლიან სპეკულაციებს იწვევდა, ახლა უკვე ღიაა. დროა, ამერიკელმა ხალხმა ყველაფერი საკუთარი თვალით ნახოს“.

მასალები აიტვირთა სპეციალურად ამ მიზნისთვის შექმნილ ახალ ონლაინ პორტალზე – PERSUE (UAP შეტაკებების საპრეზიდენტო გასაჯაროებისა და რეპორტინგის სისტემა). 70.1-მეგაბაიტიანი კოლექცია მოიცავს:

• 51 ვიდეოფაილს

• 7 აუდიოჩანაწერს

• 6 PDF დოკუმენტს

რა იმალება ახალ არქივში?

პირველი ნაწილის მსგავსად, ახალი დოკუმენტებიც ადამიანთა ჩვენებებს, სამეცნიერო მიგნებებსა და სხვადასხვა უწყების (მათ შორის, ენერგეტიკის დეპარტამენტისა და ბირთვული ობიექტების) ანგარიშებს აერთიანებს. კოლექციაში მოხვდა საბჭოთა დაზვერვის აქტივობების შესახებ არსებული დოკუმენტიც.

ყველაზე საინტერესო მასალებს შორის ვხვდებით:

• ჰურონის ტბის ინციდენტი (2023 წელი): სამხედრო სტილის ინფრაწითელი კადრები, სადაც ჩანს, თუ როგორ აგდებს აშშ-ის გამანადგურებელი ამოუცნობ ობიექტს მიჩიგანსა და კანადას შორის. მოვლენა დროში დაემთხვა ჩინური საჯაშუშო საჰაერო ბუშტის სკანდალს, თუმცა მოგვიანებით ითქვა, რომ ჩამოგდებული ობიექტი შესაძლოა უბრალოდ სამოყვარულო საჰაერო ბუშტი ყოფილიყო.

• ნარინჯისფერი სფეროები (2025 წელი): აშშ-ის დაზვერვის მოქმედი მაღალჩინოსნის ანგარიში, რომელიც 2025 წლის ბოლოს, სამხედრო ვერტმფრენიდან „მბზინავ ნარინჯისფერ სფეროებთან“ ახლო კონტაქტს აღწერს. ოფიცრის თქმით, ეკიპაჟი მომხდარმა „ფაქტობრივად უსიტყვოდ“ დატოვა.

• კოსმოსური „ციცინათელები“: NASA-ს „აპოლოსა“ და „მერკურის“ მისიების ასტრონავტების აუდიოჩანაწერები. ისინი კოსმოსში უცნაურ „ციცინათელებსა“ და „ფიფქებს“ აღწერენ, თუმცა NASA ამას მოგვიანებით ხომალდიდან მოწყვეტილი, გაყინული კონდენსაციით ხსნის.

ბუნდოვანი კადრები და ინტერნეტის იმედგაცრუება

მიუხედავად ხმაურიანი ანონსებისა, საზოგადოების თავდაპირველი რეაქცია ძირითადად იმედგაცრუებითა და დაღლილობით შემოიფარგლა. Reddit-ზე მომხმარებლები არ მალავენ, რომ მსგავსი ფორმატით ინფორმაციის მიწოდება დროის კარგვაა.

„გპირდებოდნენ, რომ ეს მეორე ნაწილი ყველაფერს შეცვლიდა… არადა, ისევ იგივეა: ბუნდოვანი წერტილები, გაურკვეველი ფორმები და არანაირი რეალური მტკიცებულება. ეს გამჭვირვალობაა თუ უბრალოდ ძველი, გადამუშავებული მისტიკური კონტენტი?!“ – წერს ერთ-ერთი მომხმარებელი.

რაც შეეხება მოთხოვნას – „გვანახეთ სხეულები“, ინტერნეტის ვერდიქტი ასეთია: ისინი ან არ არსებობენ, ან არასდროს გვაჩვენებენ, ამიტომ, უბრალოდ, უნდა შევეგუოთ.

იქნება თუ არა მესამე ნაწილი?

პენტაგონის პრესსპიკერის, შონ პარნელის განცხადებით, პორტალ war.gov/UFO-ს გაშვებიდან დღემდე მსოფლიოს მასშტაბით უკვე 1 მილიარდზე მეტი ვიზიტორი ჰყავდა. მისი თქმით, ეს რიცხვები თემისა და გამჭვირვალობისადმი უპრეცედენტო ინტერესზე მეტყველებს.

პარნელმა პარალელურად დაადასტურა, რომ ფაილების მესამე ნაწილზე მუშაობა უკვე მიმდინარეობს და მასალები ეტაპობრივად გამოქვეყნდება, თუმცა ზუსტი თარიღი ჯერ უცნობია. უპასუხებს თუ არა მომდევნო არქივი კაცობრიობის მარადიულ კითხვას – „არსებობენ უცხოპლანეტელები?“ – ამის განსჯა, როგორც ჩანს, კვლავ საზოგადოებისთვის მიუნდვიათ.