OpenAI ხელოვნური ინტელექტის ახალ ეპოქას იწყებს და GPT-5.6 მოდელების ოჯახს აანონსებს, თუმცა, უჩვეულო გარემოებების გამო, მასზე პირველად წვდომას მხოლოდ რჩეული უმცირესობა მიიღებს. აშშ-ის მთავრობის მოთხოვნით, მოდელის საჯარო გამოშვება შეიზღუდა. ახალი ხაზი სამ მუდმივ კატეგორიად იყოფა, რომლებიც სხვადასხვა სამუშაო დატვირთვაზეა მორგებული. ფლაგმანი მოდელი GPT-5.6 Sol განკუთვნილია მოწინავე მსჯელობისთვის, კვლევებისთვის, პროგრამირების, ბიოლოგიისა და კიბერუსაფრთხოების ამოცანებისთვის, რომელსაც ასევე ემატება მსჯელობის ახალი, „max“ და „ultra“ რეჟიმები. მეორე მოდელი Terra ოქროს შუალედს წარმოადგენს, რომელიც კორპორატიული გამოყენებისთვის წარმადობასა და ფასს აბალანსებს, ხოლო Luna შექმნილია, როგორც ყველაზე სწრაფი და ხელმისაწვდომი ვარიანტი ყოველდღიური, მასშტაბური დავალებებისთვის.
ფართო საზოგადოებისთვის მოდელების მყისიერად ხელმისაწვდომობის ნაცვლად, OpenAI-მ შეზღუდული წინასწარი ვერსია მხოლოდ 20-მდე სანდო პარტნიორ ორგანიზაციას გაუზიარა, რომელთა ვინაობაც აშშ-ის მთავრობისთვის უკვე ცნობილია. ეს ნაბიჯი ტრამპის ადმინისტრაციის 2 ივნისის აღმასრულებელ განკარგულებას უკავშირდება, რომელიც მოწინავე AI მოდელების დეველოპერებს ავალდებულებს, საჯარო რელიზამდე მთავრობას შეფასებისთვის წვდომა მიანიჭონ. მიუხედავად იმისა, რომ OpenAI დაემორჩილა ამ მოთხოვნას, კომპანიის აღმასრულებელმა დირექტორმა, სემ ალტმანმა უკმაყოფილება გამოთქვა იმ ფაქტის გამო, რომ მთავრობა წყვეტს, თუ ვინ მიიღებს წვდომას პირველი. მისი თქმით, ეს მხოლოდ დროებითი ზომაა და მოწინავე AI, საბოლოო ჯამში, დეველოპერებისთვის, მკვლევრებისთვის, ბიზნესებისა და საერთაშორისო პარტნიორებისთვის სრულად ხელმისაწვდომი უნდა იყოს.
თავის მხრივ, ფედერალური ოფიციალური პირები ამტკიცებენ, რომ მსგავსი სიფრთხილე საჯარო რელიზამდე პოტენციური რისკების (მაგალითად, კიბერშეტევებისა და სამხედრო მიზნებით ბოროტად გამოყენების) იდენტიფიცირებას ემსახურება. როგორც ირკვევა, დამოუკიდებელმა შემფასებლებმა დააფიქსირეს შემთხვევები, როდესაც GPT-5.6 Sol ტესტირების შედეგებით მანიპულირებას ცდილობდა, რამაც დამატებითი კონტროლის აუცილებლობა კიდევ უფრო გაამართლა. კომპანიის განცხადებით, მოდელში ინტეგრირებულია უსაფრთხოების უპრეცედენტო ზომები. ამასთან, ეს რელიზი OpenAI-ის სამომავლო სტრატეგიის ცვლილებაზეც მიუთითებს – ძველი მოდელების უბრალოდ ახლით ჩანაცვლების ნაცვლად, კომპანია Sol-ს, Terra-სა და Luna-ს დამოუკიდებელ პროდუქტებად აყალიბებს, რომლებიც ცალ-ცალკე განვითარდებიან. ეს მიდგომა ბიზნესებს საშუალებას მისცემს, წარმადობის, სისწრაფისა და ფასის მიხედვით მათთვის ყველაზე ოპტიმალური ვარიანტი თავად აირჩიონ. ტესტირების პერიოდის დასრულების შემდეგ მოდელები საჯაროდ ხელმისაწვდომი გახდება.
წყარო: Design Taxi
