OpenAI-მ ტექნიკის ბაზარზე პირველი ნაბიჯი გადადგა და წარადგინა Codex Micro – კომპაქტური პროგრამირებადი კლავიატურა, რომელიც დეველოპერებს AI-კოდირების აგენტების მართვის საშუალებას აძლევს. 230 დოლარად შეფასებული მოწყობილობა კომპანიის პირველი ბრენდირებული ტექნიკური პროდუქტია და მაშინ გამოდის, როცა OpenAI-ის კოდირების ასისტენტი Codex სულ უფრო პოპულარული ხდება. კლავიატურა კანადურ-იტალიურ მწარმოებელ Work Louder-თან ერთად შეიქმნა და მიზნად ისახავს, დეველოპერებმა მრავალაგენტიანი კოდირების დროს მენიუებში ხეტიალს თავი დააღწიონ.
მთელი ყურადღება ფუნქციონალზეა გადატანილი. ექვსი განათებული Agent Key ცალკეული აგენტის სტატუსს ფერადი ინდიკატორებით აჩვენებს, ჯოისტიკი და მბრუნავი დისკი კი მომხმარებელს პროცესებში გადაადგილებისა და მსჯელობის დონის სწრაფად რეგულირების საშუალებას აძლევს. მოწყობილობას აქვს 13 მექანიკური გადამრთველი, სენსორული პანელი და 32 ურთიერთშემცვლელი, Codex-ის თემატიკის კლავიში – ესეც საკმაო თავისუფლებას იძლევა, დეველოპერმა განლაგება საკუთარ სამუშაო სტილს მოარგოს.
Codex Micro მუშაობს Bluetooth-ითა და USB-C-ით, თავსებადია Mac-თანაც და Windows-თანაც, პირდაპირ უერთდება ChatGPT-ის დესკტოპ აპლიკაციას, სადაც მომხმარებელს შეუძლია ღილაკების ხელახლა მინიჭება, განლაგების მორგება და აგენტების მდგომარეობის თვალყურის დევნება ცალკე პროგრამის დაყენების გარეშე.
OpenAI Codex Micro-ს „აგენტური მუშაობის სამართავ ცენტრს“ უწოდებს. მოწყობილობა კომპანიის ფართო მიზანს ერგება – AI-ის დახმარებით პროგრამული უზრუნველყოფის შექმნა უფრო ხელმისაწვდომი გახადოს. Codex ცოტა ხნის წინ ChatGPT-ის დესკტოპ აპში ინტეგრირდა და მას უკვე მილიონობით ადამიანი იყენებს, რაც კარგად აჩვენებს, რამდენად აქცენტირდება კომპანია AI-კოდირების ხელსაწყოებზე.
პროდუქტის გამოშვება ისეთ დროს დაემთხვა, როცა OpenAI-ს იურიდიული დავაც აქვს – Apple კომპანიას სავაჭრო საიდუმლოს არასათანადო გამოყენებაში ადანაშაულებს, თუმცა OpenAI ბრალდებას უარყოფს. ამავე დროს, გავრცელდა ინფორმაცია სხვა ტექნიკურ პროექტზეც – პორტატიულ, უეკრანო ჭკვიან დინამიკზე, რომელსაც ChatGPT ამუშავებს. ეს კი მიანიშნებს, რომ კომპანია ერთზე მეტი ტიპის AI-მოწყობილობას სწავლობს.
Codex Micro შეზღუდული ტირაჟით გამოდის OpenAI-ის Supply Co-სა და Work Louder-ის მეშვეობით. შესაძლოა, მან შედარებით ვიწრო აუდიტორია დააინტერესოს, მაგრამ კარგ წარმოდგენას გვიქმნის იმაზე, თუ საით შეიძლება წავიდეს OpenAI-ის ტექნიკური გეგმები. ჯერჯერობით კი კომპანია AI-მალსახმობებს იქ ათავსებს, სადაც დეველოპერებს ურჩევნიათ – თითების წვერებში.
წყარო: Design Taxi
