ხელოვნური ინტელექტის ინდუსტრიაში კიდევ ერთი მნიშვნელოვანი სიახლეა – სტარტაპმა ElevenLabs ალბერტ აინშტაინის პერსონალური AI ხმოვანი აგენტი შექმნა. ფიზიკოსის საარქივო მასალებზე დაყრდნობით აგებული ეს ინსტრუმენტი სტუდენტებს საშუალებას აძლევს, სამეცნიერო კონცეფციები უშუალოდ აინშტაინის ხმის სინთეზურ რეპლიკასთან ინტერაქციული საუბრით შეისწავლონ.
ეს სიახლე ElevenLabs-ის განათლების სფეროში გაფართოების სტრატეგიის ნაწილია. ტრადიციულ სახელმძღვანელოებსა და წინასწარ ჩაწერილ ლექციებზე დაყრდნობის ნაცვლად, კომპანია აქცენტს საუბარზე დაფუძნებულ დასწავლაზე აკეთებს. აინშტაინის აგენტი ზუსტად იმისთვის შეიქმნა, რომ რთული თეორიები და სამეცნიერო ნაშრომები ცოცხალ, ჩართულობის მომტან პროცესად იქცეს.
Impact Program: ხელოვნური ინტელექტი პროფესორებისთვის
პარალელურად, ElevenLabs-მა მსოფლიოს მასშტაბით აკადემიური პერსონალისთვის ახალი ინიციატივა – Impact Program წარადგინა, რომელიც პროფესორებს Pro ვერსიაზე უფასო წვდომას აძლევს.
ინსტრუმენტს უკვე იყენებს 100-ზე მეტი ლექტორი ისეთი წამყვანი ინსტიტუტებიდან, როგორებიცაა ჰარვარდის უნივერსიტეტი, ნიუ-იორკის უნივერსიტეტი (NYU), კორნელი, სტენფორდი და ლონდონის საუნივერსიტეტო კოლეჯი (UCL). პროგრამა ასევე იძლევა კონკრეტული დავალებებისთვის სტუდენტებზე დროებითი წვდომის მინიჭების საშუალებას, რაც სასწავლო დაწესებულებებს AI ტექნოლოგიების უსაფრთხოდ ტესტირებას უმარტივებს.
წამყვან უნივერსიტეტებში ეს ტექნოლოგია უკვე გასცდა უბრალო ექსპერიმენტის ფაზას:
-
UCL: მკვლევარი ქეროლაინ მაკგეტიგანი ElevenLabs-ს 2023 წლიდან იყენებს იმის შესასწავლად, თუ როგორ აღიქვამენ ადამიანები სინთეზურ და ბუნებრივ ხმებს.
-
სტენფორდი: დანიელ რუბინმა ტექნოლოგია სამეცნიერო მასალების გასამარტივებლად შექმნილ სისტემებში დანერგა.
-
ჰარვარდის კენედის სკოლა: შარად გოელმა შეიმუშავა ინსტრუმენტი, რომლითაც სტუდენტებს ვიდეოლექციების დროს კითხვების დასმა და პასუხების უშუალოდ ლექტორის ხმით მოსმენა შეუძლიათ.
ხმოვანი ტექნოლოგიები განსაკუთრებით მნიშვნელოვანია ციფრული ხელმისაწვდომობის კუთხით. ის ეხმარება იმ სტუდენტებს, რომლებსაც კითხვის სირთულეები, მხედველობის პრობლემები ან უბრალოდ, სწავლის განსხვავებული სტილი აქვთ.
სად და როგორ მოვუსმინოთ აინშტაინს?
ფიზიკოსის აღდგენილი ხმა ElevenReader-შია ხელმისაწვდომი. მომხმარებლებს შეუძლიათ მოუსმინონ მის ნაშრომს, „ფარდობითობის სპეციალური და ზოგადი თეორია“, პირდაპირ ავტორის AI ხმით. გარდა ამისა, სალაპარაკო AI აგენტი მხარს უჭერს რამდენიმე ენას, მათ შორის ინგლისურს, გერმანულს, ფრანგულს, ბრაზილიურ პორტუგალიურსა და ესპანურს.
ამ სიახლით ალბერტ აინშტაინი შეუერთდა ElevenLabs-ის საკულტო ხმების (Iconic Voices) კოლექციას, სადაც უკვე შედიან რიჩარდ ფაინმანი, მაია ენჯელოუ, მაიკლ კეინი და მეთიუ მაკკონეჰი – რომელიც, ამავდროულად, კომპანიის ერთ-ერთი ინვესტორიცაა.
