OpenAI-ის პირველი ნაბიჯი ტექნიკური მოწყობილობების ბაზარზე, გავრცელებული ინფორმაციით, იქნება მობილური, ჭკვიანი დინამიკი, რომელიც სრულად ინტეგრირდება ChatGPT-სთან. Bloomberg-ის ცნობით, მოწყობილობას, რომელიც ამჟამად განვითარების ეტაპზეა, არ ექნება ეკრანი და კომპანიის შიგნით მას განიხილავენ, როგორც „ადამიანის მსგავს AI კომპანიონს სახლისთვის“. მიუხედავად იმისა, რომ აქამდე ვრცელდებოდა ჭორები OpenAI-ის მიერ საკუთარი სმარტფონის გამოშვების შესახებ, რაც მას Apple-ის პირდაპირ კონკურენტად აქცევდა, ახალი მოწყობილობა ტრადიციული ჭკვიანი დინამიკებისგან სრულიად განსხვავებული კონცეფციისაა.
წყაროების თანახმად, მოწყობილობას ექნება საკუთარი „პიროვნება“ და შეძლებს დროთა განმავლობაში მფლობელის შესახებ ინფორმაციის პროაქტიულად სწავლას. ის წვდომას მიიღებს მომხმარებლის ციფრულ ცხოვრებაზე, მათ შორის ელექტრონულ ფოსტაზე, რათა მაქსიმალურად პერსონალიზებული მომსახურება უზრუნველყოს. გარდა ამისა, მოწყობილობას ექნება დამოუკიდებლად მოძრავი მექანიკური ელემენტები, რითაც ის ChatGPT-ის ერთგვარ ფიზიკურ განსახიერებად იქცევა. აღსანიშნავია, რომ მის შექმნაში მონაწილეობენ Apple-ის ყოფილი ინჟინრები, რომლებმაც თავის დროზე iPhone-ისა და Mac-ის შექმნაში შეიტანეს დიდი წვლილი.
ახალი ტექნიკის შექმნის პარალელურად, OpenAI სერიოზულ იურიდიულ პრობლემებშია გახვეული. გასულ კვირას Apple-მა კომპანიას კომერციული საიდუმლოებების მოპარვაში დასდო ბრალი და განაცხადა, რომ ეს მხოლოდ „აისბერგის მწვერვალია“ და იურიდიული პროცესის მსვლელობისას მეტი დარღვევა გამოვლინდება. მიუხედავად იმისა, რომ OpenAI ბრალდებებს უარყოფს, შიდა წყაროები ირწმუნებიან, რომ მათი ახალი პროდუქტი იმდენად განსხვავდება Apple-ის დღევანდელი შეთავაზებებისგან, რომ კომერციული საიდუმლოებების დარღვევის შანსი პრაქტიკულად არ არსებობს.
OpenAI-ის ეს ნაბიჯი ემთხვევა მომხმარებელთა ხელოვნური ინტელექტის აპარატურის მიმართ მზარდ ინტერესს. ტექნოლოგიური სამყაროს ენთუზიაზმის ნათელი მაგალითია ბრეტ ადკოკის მიერ დაფუძნებული AI ლაბორატორია Hark, რომელმაც მაისში 700 მილიონი დოლარის ინვესტიცია მოიზიდა და 6 მილიარდ დოლარად შეფასდა. კომპანია აშენებს ე. წ. „პერსონალურ ინტელექტს“ – უნივერსალურ ინტერფეისს ადამიანებსა და მანქანებს შორის, მიუხედავად იმისა, რომ თავად მოწყობილობის ფორმა და დიზაინი ჯერ არც კი გაუსაჯაროებიათ. ეს ფაქტი კიდევ ერთხელ უსვამს ხაზს, თუ რამხელა კაპიტალი ტრიალებს ამ სფეროში ჯერ კიდევ პროდუქტების გამოსვლამდე.
წყარო: TechChrunch
