ოდესღაც ვიდეოთამაშებს უამრავი ფიზიკური დანამატი (გზამკვლევები, რუკები, ინსტრუქციები) მოჰყვებოდა, თუმცა დღემდე გეიმერებისთვის ყველაზე ხელშესახები ნივთი მაინც თავად დისკი იყო. ახლა კი, როდესაც Grand Theft Auto 6-ის წინასწარი შეკვეთები დაიწყო, დეველოპერმა Rockstar-მა განაცხადა, რომ ფიზიკური გამოცემის მყიდველები ყუთში დისკის ნაცვლად მხოლოდ ციფრული ჩამოტვირთვის ერთჯერად კოდს მიიღებენ. მიუხედავად იმისა, რომ ეს პირველი შემთხვევა არ არის, გასართობი ინდუსტრიის ერთ-ერთი ყველაზე დიდი ფრენჩაიზის ამგვარი გადაწყვეტილება აჩენს კითხვას: ნიშნავს თუ არა ეს დისკების ეპოქის დასასრულს და რას გვეუბნება ეს ციფრულ ხანაში თამაშზე საკუთრების უფლების შესახებ?
გეიმერების რეაქცია არაერთგვაროვანია. ნაწილი დაბნეული და იმედგაცრუებულია, რადგან დისკის ქონა თამაშის მეგობრისთვის თხოვების ან მოგვიანებით გადაყიდვის შესაძლებლობას იძლეოდა. მეორე მხრივ, მომხმარებელთა უფლებების დამცველი მოძრაობის, Stop Killing Games-ის დამფუძნებელი როს სკოტი მიიჩნევს, რომ პრობლემა არა უშუალოდ დისკის არარსებობაში, არამედ გამომცემლების მიმართ ნდობის ნაკლებობაშია. მისი თქმით, ეს არის მომხმარებლის მიმართ მტრულად განწყობილი პრაქტიკის სიმპტომი, რადგან კომპანიები ხშირად თიშავენ სერვერებს და ნაყიდ თამაშებზე წვდომას სამუდამოდ ბლოკავენ. თუმცა იმ მოთამაშეებისთვის, რომლებიც ძირითადად ციფრულ ვერსიებს იყენებენ და PS5-ისა თუ Xbox-ის უდისკო კონსოლებს ფლობენ, ეს სიახლე დიდ პრობლემას არ წარმოადგენს.
Rockstar-ს გადაწყვეტილების მიზეზები ოფიციალურად არ განუმარტავს, თუმცა ექსპერტები რამდენიმე ვერსიას განიხილავენ. შესაძლოა, სტუდიას სურს თავიდან აირიდოს ინფორმაციის გაჟონვა და თამაშის გამოსვლამდე კოდების არალეგალური გავრცელება. გარდა ამისა, შესაძლოა თამაშის განვითარებისა და დახვეწის პროცესი იმდენად ბოლო წუთამდე გაგრძელდეს, რომ დისკზე მისი მოძველებული ვერსიის ჩაწერა მოუწიოთ. სკეპტიკოსების აზრით კი, ეს უბრალოდ ფიზიკურ კოპიებზე მეტი ფულის გამომუშავების მარტივი გზაა. ინდუსტრიაში ციფრული გაყიდვები უკვე ისედაც დომინირებს და ამ ტრენდს Nintendo-ც კი მიჰყვება თავისი „Game-Key“ ბარათებით.
ამ გადაწყვეტილებამ ზოგიერთი დამოუკიდებელი საცალო მოვაჭრის პროტესტიც გამოიწვია. მაღაზიებმა (როგორებიცაა VGP და Lootbox Gaming) ფიზიკური მედიის ღირებულების შენარჩუნების მიზნით უარი თქვეს „კოდი ყუთში“ ვერსიის გაყიდვაზე, ზოგმა კი პეტიციაც წამოიწყო დისკის დაბრუნების მოთხოვნით. თუ დისკები მართლაც ქრება, საფრთხის ქვეშ დგება შუაღამის რელიზების ტრადიციაც, როდესაც გეიმერები საათობით იდგნენ რიგში ფიზიკური ასლის პირველად შესაძენად. 19 ნოემბერს, როდესაც თამაში PlayStation 5-ისა და Xbox Series-ისთვის გამოვა, ერთგულ ფანებს მხოლოდ ის იმედიღა რჩებათ, რომ დისკის არარსებობის ფონზე, ყუთის გახსნისას GTA-ს ტრადიციული რუკა და სხვა საკულტო ფიზიკური ატრიბუტები მაინც დახვდებათ.
წყარო: BBC
