ბოლო წლების განმავლობაში მობილური ფოტოგრაფიის მოყვარულებისთვის ჩინური ტექნოლოგიური გიგანტის, Xiaomi-ის სმარტფონები ერთ-ერთ საუკეთესო ალტერნატივად იქცა. ეს ნაწილობრივ მობილური აპარატურის განვითარების, უმთავრესად კი გერმანულ ლეგენდარულ ბრენდთან, Leica-სთან კოლაბორაციის შედეგია. იმ ფონზე, როდესაც თანამედროვე სმარტფონების ფოტოები ხშირად ზედმეტად დამუშავებული და ხელოვნურია, Leica-მ შეძლო რეალისტური, დახვეწილი ფერების შექმნა. ამ თანამშრომლობის შედეგად მიღებული ფოტოები ტრადიციული ტელეფონით გადაღებულს აღარ ჰგავს. სწორედ ამ წარმატებული მიმართულების გასაგრძელებლად, კომპანიამ ვენაში ახალი მოდელები – Xiaomi 17T და 17T Pro წარადგინა.
კამერის აპლიკაციაში გადაღების ორი ძირითადი რეჟიმია ხელმისაწვდომი: Leica Vibrant და Leica Authentic. პირველი მათგანი ტიპური სმარტფონის ფოტოების შედარებით ნაკლებად გაჯერებული ვერსიაა, ხოლო მეორე რეჟიმი მომხმარებელს ვინეტირებულ, მაღალკონტრასტულ კადრებს სთავაზობს, რომლებიც ძალიან ჰგავს პროფესიონალური კამერით გადაღებულ და დამუშავებულ სურათებს. Leica-ს მობილური განვითარების ხელმძღვანელის, პაბლო ასევედო ნოდას განმარტებით, Authentic რეჟიმი სპეციალურად იმ ადამიანებისთვის შეიქმნა, რომლებიც ტრადიციული ფოტოგრაფიიდან მოდიან. მობილურებში დეტალების მინიატურიზაცია კომპიუტერული დამუშავების ჭარბ გამოყენებას მოითხოვს, თუმცა ავტორებმა გადაწყვიტეს, შეექმნათ უფრო სუფთა, კამერის მსგავსი ვიზუალი. მნიშვნელოვანია ისიც, რომ ეს რეჟიმები უბრალოდ ფილტრები არ არის – ისინი უშუალოდ კადრის აღბეჭდვის მომენტიდან მუშავდება და პროცესორში (ISP) ორ სრულიად განსხვავებულ სისტემას იყენებს.
რას ნიშნავს სინამდვილეში „ავთენტურობა“?
ჩნდება კითხვა, თუ რის მიმართ არის „ავთენტური“ ახალი რეჟიმი. Leica-ს მობილური ბიზნესის ვიცე-პრეზიდენტი, მარიუს ეშვაილერი ხსნის, რომ ეს რეჟიმი ფოკუსირებულია არა კონკრეტული კამერის მოდელის იმიტაციაზე, არამედ გარემოსა და ობიექტის ბუნებრივად ასახვაზე რეალური ფერებითა და ჩრდილებით. ამ მიდგომის გამო დასაწყისში შიაომის ინჟინრებთან სერიოზული დავაც კი ჰქონდათ. სმარტფონების სამყაროში ნათელი და მბზინავი ფოტოები სტანდარტად ითვლება, თუმცა Leica ამტკიცებდა, რომ სერიოზული ფოტოგრაფიის კუთხით სავსებით მისაღებია, თუ ჩრდილები ბოლომდე განათებული არ არის. სწორედ დაუმუშავებელი, ბუნებრივი სიბნელე ანიჭებს კადრს რეალურ ხასიათს. მიუხედავად ამისა, მათ დატოვეს Vibrant ალტერნატივაც იმ მომხმარებლებისთვის, რომლებსაც უფრო ფერადი სურათები ურჩევნიათ.
ახალი ფუნქცია და ფოტოგრაფიის ფილოსოფია
Xiaomi 17T სერიის კიდევ ერთი მთავარი სიახლეა Leica Live Moment რეჟიმი (Apple-ის Live Photos-ის ანალოგი), რომელიც ფოტოს გარშემო მოკლე ვიდეოკადრებს ამატებს და ის უკვე პორტრეტის რეჟიმშიც ხელმისაწვდომია. ერთი შეხედვით, ეს შეიძლება ეწინააღმდეგებოდეს ლეგენდარული ფოტოგრაფის, ანრი კარტიე-ბრესონის ფილოსოფიას „გადამწყვეტი მომენტის“ დაჭერის შესახებ. თუმცა ეშვაილერი განმარტავს, რომ პროფესიონალებისგან განსხვავებით, სმარტფონის მომხმარებლებს ხშირად არ აქვთ შესაბამისი გამოცდილება სწორი მომენტის ზუსტად დასაჭერად. ამიტომ, ახალი ინსტრუმენტი მათ სწორედ საუკეთესო, გადამწყვეტი კადრის შერჩევაში ეხმარება გადაღების შემდგომ.
საბოლოოდ, მიუხედავად იმისა, რომ შიაომის სმარტფონები ჩრდილოეთ ამერიკის ბაზარზე ფართოდ ხელმისაწვდომი არ არის, ამ მოდელების შედეგები მკვეთრად განსხვავდება ყველა იმ ტრადიციული ალტერნატივისგან, რასაც სხვა კომპანიები მომხმარებელს სთავაზობენ. კომპანიამ მოახერხა სმარტფონის რეალობის ფარგლებში დარჩენა და მასში ტრადიციული ფოტოგრაფიული ღირებულებების ეფექტიანად ინტეგრირება.
წყარო: Fast Company
