Ferrari-ის ახალი მოდელი ტრადიციულ სისწრაფეს, დრამატულობასა და გამოძერწილ ფორმებს გვპირდება, თუმცა ამჯერად ძრავის ნაცნობი ღრიალი ჩუმმა გუგუნმა ჩაანაცვლა. რომში, იტალიურმა საავტომობილო გიგანტმა ოფიციალურად წარადგინა Luce – ბრენდის ისტორიაში პირველი სრულად ელექტრომობილი. მის დიზაინზე კი Apple-ის დიზაინის ყოფილმა ხელმძღვანელმა, ჯონი აივმა (Jony Ive) იზრუნა.
ავტომობილი წლების განმავლობაში იქმნებოდა კრეატიულ კოლექტივ LoveFrom-თან თანამშრომლობით, რომელიც ჯონი აივმა და ინდუსტრიულმა დიზაინერმა, მარკ ნიუსონმა დააფუძნეს. Luce ერთდროულად რამდენიმე ისტორიულ სტატუსს ატარებს: ის ბრენდის პირველი ელექტრომობილი, პირველი ხუთადგილიანი მოდელი და პირველი სერიული ავტომობილია, რომელიც კომპანიის შიდა დიზაინ-სტუდიის მიღმა შეიქმნა.
ერთი შეხედვითაც ნათელია, რომ Ferrari-მ სრულიად განსხვავებული გზა აირჩია. მძაფრი კუთხეებისა და ტრადიციული, დაბალი თეატრალური სილუეტის ნაცვლად, Luce ბევრად რბილ კონტურებსა და მინის უზარმაზარ ზედაპირებს ირჩევს. მისი ფორმა გრან-ტურიზმოს, კროსოვერსა და ფუტურისტულ Shooting Brake-ს შორის ბალანსირებს.
კორპუსს მცურავი აეროდინამიკური ელემენტები ერწყმის, უზარმაზარი, ტურბინის სტილის ბორბლები კი (წინ 23-დუიმიანი და უკან 24-დუიმიანი) ავტომობილის ექსპერიმენტულ პროპორციებს უსვამს ხაზს. თავად მოდელის სახელიც სიმბოლურია – იტალიურად ის „სინათლეს“ ნიშნავს, რითაც კომპანია ხაზს უსვამს, რომ ელექტროფიკაცია ბრენდის ევოლუციას წარმოადგენს და არა საკუთარ ღირებულებებზე უარის თქმას.
სალონში ჯონი აივისა და LoveFrom-ის გავლენა ყველაზე მკაფიოდ იგრძნობა. მართვის პანელი საგულდაგულოდ არიდებს თავს გიგანტური პლანშეტების ესთეტიკას, რაც თანამედროვე ელექტრომობილებში ლამის დაუწერელ კანონად იქცა. ამის საპირისპიროდ, Luce-ში OLED ეკრანები დახვეწილად არის შერწყმული ალუმინის ტაქტილურ ჩამრთველებთან და მბრუნავ რეგულატორებთან. მექანიზმები ისეთი საინჟინრო სიზუსტით არის გათვლილი, რომ მძღოლს ფუნქციების მართვა მენიუში დაუსრულებელი ძრომიალის გარეშე შეუძლია.
ჯონი აივი დიდი ხანია აკრიტიკებს ავტომობილებში ეკრანებით გადატვირთულ ინტერფეისებს და მიიჩნევს, რომ მძღოლს ყურადღება არ უნდა ეფანტებოდეს. Luce-ის სალონიც ზუსტად ამ მინიმალისტურ და პრაგმატულ ფილოსოფიას მიჰყვება.
იტალიური სული ელექტროძრავაში
დახვეწილი დიზაინის მიღმა კვლავ ის მანქანა იმალება, რომელსაც Ferrari-ის ტემპერამენტი აქვს. Luce აღჭურვილია ოთხი ელექტროძრავით, რომლებიც ჯამში 1,000 ცხენის ძალაზე მეტს გამოიმუშავებს და მაღალი ენერგეტიკული სიმკვრივის მქონე 122 კვტ/სთ მოცულობის ბატარეით იკვებება.
-
აჩქარება: 0-დან 100 კმ/სთ-მდე (62 მილი/სთ) დაახლოებით 2.5 წამში.
-
მაქსიმალური სიჩქარე: 305 კმ/სთ-ზე მეტი (190 მილი/სთ).
უნიკალური მართვის დინამიკის შესანარჩუნებლად, მოდელს დაემატა აქტიური დაკიდების სისტემა და ოთხივე წამყვანი თვალი. რაც შეეხება ხმას – Ferrari-მ უარი თქვა ძრავის ხელოვნურ სიმულაციაზე. მის ნაცვლად, საგანგებოდ შექმნილი აუდიოსისტემა რეალური მექანიკური ნაწილების ვიბრაციას აძლიერებს და სალონში ბუნებრივ, ავთენტურ ჟღერადობას ქმნის.
მაშინ, როცა რიგმა მაღალი კლასის ავტომწარმოებლებმა, მათ შორის Lamborghini-მ, შიდა წვის ძრავების მოყვარული მომხმარებლების სკეპტიციზმისა და შემცირებული მოთხოვნის გამო ელექტრომობილების პროგრამები შეანელეს, Ferrari თამამად მიიწევს წინ. ბრენდი ფსონს დებს იმაზე, რომ მისი აუდიტორია მზად არის, ელექტროფიკაციას ზუსტად ამ კუთხით – დიზაინსა და ესთეტიკაზე ფოკუსირებული მიდგომით შეხვდეს.
მოლოდინების თანახმად, ავტომობილის ფასი, კონფიგურაციის მიხედვით, 1 მილიონ დოლარს საგრძნობლად გადააჭარბებს, რაც მას პირდაპირ ულტრა-ლუქს კატეგორიაში ათავსებს. პირველი მოდელები მფლობელებს 2026 წლის ბოლოს ჩაბარდებათ.
