ბოლო წლებში ბიუჯეტური სმარტფონები ტექნიკურად საკმაოდ დაიხვეწა, თუმცა ერთი მთავარი პრობლემა მაინც რჩება – ისინი ერთჯერად, მალფუჭებად ნივთებად აღიქმება. როგორც წესი, მათი ელემენტი წელიწად-ნახევარში დეგრადირდება, კორპუსი მარტივად იკაწრება და წარმადობაც მალევე ეცემა. TECNO SPARK 50 Pro სწორედ ამ მოცემულობის შეცვლას ისახავს მიზნად. ტელეფონი ორიენტირებულია არა მხოლოდ მშრალ მონაცემებზე, არამედ პრაქტიკულ გამძლეობაზე. მიუხედავად იმისა, რომ მისი სისქე სულ რაღაც 7.8 მილიმეტრია და ვიზუალურად მასიურ, უხეშ მოწყობილობას არ ჰგავს, მისი შიდა მახასიათებლები და სერტიფიკატები სრულიად სხვა რეალობაზე მეტყველებს.
TECNO SPARK 50 Pro-ს ერთ-ერთი მთავარი უპირატესობა ელემენტის ხანგრძლივი სიცოცხლისუნარიანობაა. ის ორი ვერსიით გამოდის: 5,600mAh-იანი ორუჯრედიანი და 6,000mAh-იანი ერთუჯრედიანი მოდელების სახით. ორივე მათგანი სერტიფიცირებულია ისე, რომ 1900-ზე მეტი დატენვის ციკლის შემდეგაც კი საწყისი მოცულობის 80%-ზე მეტი შეინარჩუნოს. ეს ყოველდღიური დატენვის პირობებში დაახლოებით 6-წლიან სტაბილურ მუშაობას ნიშნავს, რაც ამ ფასის კატეგორიისთვის მართლაც უჩვეულო დაპირებაა.
ამასთან, 60W Super Charge მხარდაჭერით ტელეფონი 30 წუთში 63%-მდე იტენება, ხოლო სრულად დასატენად 55 წუთი სჭირდება. მას აქვს დატენვის სამი ადაპტური რეჟიმი ტემპერატურისა და სისწრაფის დასაბალანსებლად. ასევე, ინტეგრირებულია ენერგიის პირდაპირ დედაპლატაზე მიწოდების (Bypass charging) ფუნქცია, რომელიც თამაშის ან სტრიმინგის დროს ტელეფონის დატენვისას ელემენტს ზედმეტი დატვირთვისა და გადახურებისგან იცავს.
სმარტფონის გულში MediaTek Helio G100 Ultimate პროცესორი ძგერს, რომელსაც AnTuTu ტესტში დაახლოებით 550 000 ქულა აქვს. Memory Fusion 4.0 ტექნოლოგიის წყალობით კი ვირტუალური ოპერატიული მეხსიერების (RAM) 24GB-მდე გაზრდაა შესაძლებელი. მოწყობილობა აღჭურვილია 6.78-ინჩიანი IPS LCD ეკრანით, რომლის 120Hz-იანი განახლების სიხშირე გლუვ სქროლინგსა და თამაშის სასიამოვნო პროცესს უზრუნველყოფს. აუდიო გამოცდილებას აუმჯობესებს DTS Sound ტექნოლოგიის მქონე ორმაგი სტერეო დინამიკები, რაც ვიდეოებსა და მუსიკას ბიუჯეტური კლასისთვის უჩვეულო სიღრმეს სძენს.
ფოტოგრაფიის მიმართულებით მთავარ როლს 50-მეგაპიქსელიანი Sony LYTIA 600 სენსორი (1/1.953-ინჩიანი ზომითა და f/1.8 დიაფრაგმით) ასრულებს. მსგავსი პარამეტრები მას თავისი კლასის სტანდარტულ სენსორებთან შედარებით სინათლის უკეთ აღქმის საშუალებას აძლევს. FlashSnap ტექნოლოგია ჩამკეტის სიჩქარეს წამის 1/10,000-მდე ზრდის, რაც სწრაფად მოძრავი ობიექტების მკაფიოდ აღბეჭდვაში დაგეხმარებათ. სურათების გასაუმჯობესებლად ტელეფონს ხელოვნურ ინტელექტზე დაფუძნებული ხელსაწყოები – ავტომატური წაშლის (AI Eraser 2.0) და კადრის გაფართოების (AI Extender) ფუნქციებიც აქვს ინტეგრირებული.
ყველაზე მეტად SPARK 50 Pro ფიზიკური გამძლეობით გამოირჩევა და კონკურენტებს საგრძნობლად უსწრებს. მას მინიჭებული აქვს IP68 და IP69 რეიტინგები, რაც უზრუნველყოფს სრულ დაცვას მტვრის, წვიმის, სითხის დაღვრისა და მაღალი წნევის წყლის ჭავლისგანაც კი. გარდა ამისა, მან მოიპოვა SGS-ის ხუთვარსკვლავიანი პრემიუმ სერტიფიკატი ვარდნის მიმართ მედეგობაში, რისთვისაც მრავალკუთხოვანი დარტყმებისა და ვარდნის 41 დამოუკიდებელი ტესტი გაიარა. მოდელი ხუთ ფერშია ხელმისაწვდომი: Ink Black, Titanium Grey, Midnight Blue, Dynamic Orange და Cloud White.
წყარო: Yanko Design
