იერუსალიმის ებრაული უნივერსიტეტის მეცნიერებმა საინტერესო რამ აღმოაჩინეს: სხვებთან კონტაქტის სურვილი ტვინში ფიზიკურ მოძრაობამდე რამდენიმე წამით ადრე იბადება. კვლევისთვის მათ პატარა ზებრათევზები გამოიყენეს, რომელთა გამჭვირვალე სხეულიც მეცნიერებს იდეალურ შესაძლებლობას აძლევს, პირდაპირ დააკვირდნენ, თუ რა ხდება ტვინში რეალურ დროში. ექსპერიმენტმა აჩვენა, რომ როდესაც თევზი სხვასთან მიახლოებას იწყებს, მის გონებაში სოციალური ქცევის უხილავი, მაგრამ ძალიან კონკრეტული სცენარი იწერება.
ეს მოსამზადებელი ეტაპი, რომელსაც მეცნიერებმა „გადაწყვეტილების წინარე მდგომარეობა“ უწოდეს, ტვინში საინტერესო ცვლილებებს იწვევს. ემოციებზე პასუხისმგებელი უბნები მკვეთრად აქტიურდება, ჩვეულებრივი, ავტომატური ფუნქციების მართვა კი ნელდება. მნიშვნელოვანია ისიც, რომ ეს მექანიზმი ირთვება მხოლოდ მაშინ, როცა საქმე ნამდვილ, ცოცხალ არსებას ეხება და არა რაიმე უსულო, მოძრავ საგანს. კვლევამ ისიც დაადასტურა, რომ ვისაც ეს შინაგანი მომზადების პროცესი უფრო ძლიერად ჰქონდა გამოხატული, რეალურ ცხოვრებაშიც მეტი სოციალურობითა და კონტაქტურობით გამოირჩეოდა.
მართალია, ადამიანისა და თევზის ტვინი ერთმანეთისგან განსხვავდება, მაგრამ საბაზისო ნევროლოგიური მექანიზმები ბევრ საერთოს იზიარებს. ამ აღმოჩენას დიდი პრაქტიკული მნიშვნელობა აქვს მედიცინისთვის. თუ ზუსტად გავიგებთ, როგორ ემზადება გონება კომუნიკაციისთვის, მომავალში ბევრად მარტივი გახდება სოციალური ქცევის ისეთი რთული დარღვევების მიზეზების პოვნა, როგორებიცაა აუტიზმი, დეპრესია თუ სოციალური შფოთვა. საბოლოო ჯამში, ეს სპეციალისტებს დაეხმარება, პრობლემა ბევრად ადრე დაინახონ, ვიდრე ის ადამიანის ყოველდღიურ ქცევაში აისახება.
წყარო: Inc.
