Warner Bros. Pictures Animation სამომავლო გეგმებს ახალი ლოგოთი და შეცვლილი სტრატეგიით ხვდება. 23 ივნისს, ანესის ანიმაციური ფილმების საერთაშორისო ფესტივალზე (Annecy International Animation Film Festival), სტუდიამ თავის ისტორიაში ყველაზე მასშტაბური პრეზენტაცია გამართა. ახალი ლოგო ინარჩუნებს Warner Bros.-ის ტრადიციულ ფარს, თუმცა მეტალის ბზინვარე ეფექტს ხელით ნახატი, მქრქალი ვიზუალი ანაცვლებს. მის ქვემოთ, ხელნაწერის სტილში, სიტყვა „Animation“ არის დატანილი. სტუდიის ახალი ინტრო ფანქრის ესკიზით იწყება, რომელიც ნელ-ნელა ფერებით ივსება და მასში სტუდიის მდიდარი მემკვიდრეობის პატივსაცემად პერსონაჟი ტვიტიც (Tweety) ჩნდება.
ვიზუალური განახლება სტუდიის პრეზიდენტისა და მთავარი კრეატიული დირექტორის, ბილ დამაშკეს შემოქმედებით ფილოსოფიას ასახავს. ანესიში გამოსვლისას მან Warner Bros. Pictures Animation-ს „მხატვრებზე ორიენტირებული“ სტუდია უწოდა. ეს ნიშნავს, რომ მომავალი პროდუქცია ერთი კონკრეტული და ცნობადი სტილის ნაცვლად, განსხვავებული და ინდივიდუალური მხატვრული ხედვებით შეიქმნება. სტუდიას სურს, რომ თითოეულ ფილმს საკუთარი უნიკალური იდენტობა ჰქონდეს, რომლებსაც მხოლოდ ერთი საერთო მახასიათებელი – „გულწრფელობაზე, იმედსა და იუმორზე“ აგებული ისტორიები გააერთიანებს. ახალი ბრენდინგი ასევე ეხმიანება სტუდიის ისტორიულ Termite Terrace-ს – მოკრძალებულ ბუნგალოს ბერბანკში, სადაც ანიმატორთა თაობებმა ბაგზ ბანი, დაფი დაქი და სხვა ლეგენდარული პერსონაჟები შექმნეს.
ახალი ლოგოს წარდგენის გარდა, სტუდიამ 2026-2028 წლების ამბიციური გეგმაც გაასაჯაროვა და 7 მომავალი თეატრალური რელიზის პრევიუ აჩვენა. მაყურებელმა იხილა კადრები ფილმიდან The Cat in the Hat, რომლის პრემიერაც 6 ნოემბერს იგეგმება. ასევე წარადგინეს ისეთი პროექტები, როგორებიცაა Bad Fairies, The Lunar Chronicles და Margie Claus. სრულმეტრაჟიანი ფილმების გარდა, პრეზენტაციაზე შედგა ახალი მოკლემეტრაჟიანი ანიმაციის, Daffy Season-ის დებიუტიც, სადაც დაფი დაქი და ელმერ ფადი ბრუნდებიან.
წყარო: Design Taxi
