Commodore ტექნოლოგიურ სამყაროს კვლავ უბრუნდება, თუმცა ამჯერად სრულიად განსხვავებული მიდგომით. კომპიუტერების ლეგენდარულმა ბრენდმა გამოუშვა დასაკეცი ტელეფონი, რომელიც ადრეული 2000-იანების ესთეტიკასა და თანამედროვე ციფრული გადატვირთულობის პრობლემის გადაჭრას აერთიანებს.
ბრენდის ახალი მოდელი, სახელწოდებით Callback 8020, ტრადიციულ და თანამედროვე სმარტფონებს შორის არსებულ ოქროს შუალედს წარმოადგენს. მოწყობილობა Sailfish ოპერაციულ სისტემაზე მუშაობს და მიზანმიმართულად, სისტემურ დონეზე ბლოკავს ვებბრაუზერებს, სოციალურ ქსელებს, ელექტრონულ ფოსტასა და სამუშაო აპლიკაციებს, რათა მომხმარებელი უსასრულო სქროლინგისგან დაიცვას.
მიუხედავად ამ ციფრული დეტოქსის ფილოსოფიისა, ტელეფონი სრულად მოწყვეტილი არ არის გარე სამყაროს. მომხმარებლებს წვდომა აქვთ ისეთ აუცილებელ აპლიკაციებზე, როგორებიცაა WhatsApp, Signal, Telegram, Spotify, Uber და Google Maps.
ტელეფონის ვიზუალი სრულად რეტრო სტილშია გადაწყვეტილი. მას აქვს 3.25-ინჩიანი შიდა ეკრანი და მცირე ზომის გარე მონიტორი, რომელიც კლასიკური Commodore-ის კალკულატორებითაა შთაგონებული. მოწყობილობაში შენარჩუნებულია T9 კლავიატურა, მოსახსნელი ელემენტი, ყურსასმენის ჯეკი და FM რადიო. კამერას რეტრო ფილტრები აქვს დამატებული, ხოლო Commodore 64-ის ფანებს კლასიკური თამაშები და სინთეზატორის (SID) ჟღერადობით შთაგონებული ზარის მელოდიები დახვდებათ.
Callback 8020 აღჭურვილია MediaTek Helio G81 პროცესორით, 4GB ოპერატიული და 64GB გაფართოებადი შიდა მეხსიერებით. ფოტოგადაღებას 48-მეგაპიქსელიანი Sony-ს სენსორი უზრუნველყოფს, მაღალი ხარისხის ჟღერადობაზე კი (სადენიანი ყურსასმენებისთვის) სპეციალური ESS და Cirrus Logic აუდიოჩიპები ზრუნავს.
პროექტს ხელმძღვანელობს რეტრო-ტექნიკის შემქმნელი კრისტიან სიმპსონი. მისი თქმით, ეკრანზე დამოკიდებულების შემცირების იდეა მას შემდეგ გაუჩნდა, რაც მამა გახდა. Commodore-ის ხედვით, სმარტფონის სრულად ჩანაცვლების ნაცვლად, ეს არის იდეალური მეორე ტელეფონი შაბათ-კვირისთვის ან ოჯახური გარემოსთვის.
მოდელი რამდენიმე ფერში გამოვა, მათ შორის: BASIC Beige, ProtoPET White, SX Silver, გამჭვირვალე Starlight Edition და პრემიუმ Founder’s Edition ოქროსფერი დეტალებით. მისი ფასი 499-დან 640 დოლარამდე მერყეობს. წინასწარი შეკვეთები 30 ივნისიდან იწყება, ხოლო ტელეფონების მიწოდება მოგვიანებით, 2026 წლის განმავლობაში იგეგმება.
წყარო: Design Taxi
