ტექნოლოგიური გიგანტი Apple მეხსიერების ჩიპების მიწოდების გლობალურ კრიზისში აღმოჩნდა და გამოსავალს საკმაოდ სარისკო, პოლიტიკური წინაღობებით სავსე გზაში ხედავს. ხელოვნური ინტელექტის ინფრასტრუქტურის წარმოუდგენლად სწრაფმა ზრდამ და მონაცემთა ცენტრების გაფართოებამ მსოფლიოში DRAM და NAND მეხსიერებაზე მოთხოვნა გაზარდა, რამაც, თავის მხრივ, ფასების მკვეთრი ნახტომი გამოიწვია. სწორედ ამიტომ მოუწია კომპანიას ცოტა ხნის წინ MacBook-ისა და iPad-ის ხაზზე ფასების გაზრდა. მიუხედავად იმისა, რომ Apple ტრადიციულად ისეთ მომწოდებლებზე იყო დამოკიდებული, როგორებიცაა Micron, Samsung და SK hynix, ახლა ის ალტერნატიულ გზებს ეძებს და Financial Times-ის ცნობით, უკვე მთელი თვეა ტრამპის ადმინისტრაციასთან აქტიურ ლობირებას ეწევა. მათი მთავარი მიზანია, მიიღონ ნებართვა ჩინეთის უმსხვილესი DRAM მწარმოებლისგან, ChangXin Memory Technologies-ისგან (CXMT) ჩიპების შესაძენად.
თუმცა ამ გეგმას ერთი ძალიან დიდი დაბრკოლება აქვს – ვაშინგტონი ჩინეთის ტექნოლოგიური ამბიციების შეზღუდვას ცდილობს, აშშ-ის თავდაცვის დეპარტამენტს კი CXMT პეკინის შეიარაღებულ ძალებთან კავშირში მყოფ სამხედრო კომპანიად ჰყავს გამოცხადებული. მართალია, ეს სტატუსი ამერიკულ ფირმებს მათთან ბიზნესის კეთებას ავტომატურად არ უკრძალავს, მაგრამ კომპანიას პოლიტიკური გამადიდებელი შუშის ქვეშ აქცევს. სწორედ ამიტომ, Apple ცდილობს მთავრობისგან მიიღოს მყარი გარანტიები, რომ ამ ნაბიჯის გამო სამომავლოდ მოულოდნელი ჯარიმების ან პოლიტიკის გამკაცრების მსხვერპლი არ გახდება.
ეს ისტორია ძალიან ჰგავს 2022 წლის მოვლენებს, როდესაც კომპანიამ flash-მეხსიერების კიდევ ერთი ჩინური მწარმოებლისგან (YMTC) შეძენა სცადა, თუმცა ამერიკელი კანონმდებლების ორპარტიული მწვავე კრიტიკისა და საექსპორტო შეზღუდვების გამო უკან დახევა მოუწია. როგორც ჩანს, Apple ახლაც ურთულეს ბეწვის ხიდზე გადის და საკუთარი კომერციული ინტერესების გადასარჩენად გეოპოლიტიკურ ლაბირინთებში მანევრირებას კვლავ რისკავს.
წყარო: Financial Times
