PlayStation-ის მოთამაშეთა თაობებისთვის დისკის ტრიალის ნაცნობი ხმა ახალი თავგადასავლის დაწყებას ნიშნავდა. თუმცა ეს რიტუალი მალე წარსულს ჩაბარდება. Sony-მ ოფიციალურად დაადასტურა, რომ 2028 წლის იანვრიდან ახალი თამაშები ფიზიკურ დისკებზე აღარ გამოვა, რითაც თითქმის სამათწლეულიანი ეპოქა სრულდება.
კომპანიის ეს გადაწყვეტილება მომხმარებელთა შეცვლილ ქცევას ასახავს. ციფრულმა ჩამოტვირთვებმა მნიშვნელოვნად გადააჭარბა ყუთებში მოთავსებული თამაშების გაყიდვებს. Sony-ის მონაცემებით, 2026 ფისკალურ წელს თამაშების 78% სწორედ ციფრული ფორმატით გაიყიდა. ვინაიდან ფიზიკურ დისკებს უკვე ძალიან მცირე წილი უკავია, მომავალში რელიზები მხოლოდ PlayStation Store-ში ან საცალო მაღაზიებში ციფრული აქტივაციის კოდების სახით იქნება ხელმისაწვდომი.
ეს ნაბიჯი სრულად ციფრულ ეკოსისტემაზე ეტაპობრივი გადასვლის ლოგიკური გაგრძელებაა, რაც უკვე გამოჩნდა PlayStation 5 Digital Edition-ისა და ექსკლუზიურად ციფრული PS5 Pro-ს გამოშვებით. ამასთან, კომპანია ხაზს უსვამს, რომ საგანგაშო არაფერია მათთვის, ვინც ძველ თამაშებს ფლობს – 2028 წლის იანვრამდე გამოსული ფიზიკური თამაშები კვლავ სრულად ხელმისაწვდომი და სამუშაო მდგომარეობაში დარჩება.
ბევრი მოთამაშისთვის ეს სიახლე მხოლოდ კომფორტის საკითხი არ არის. ფიზიკური კოპიები იძლეოდა ისეთ შესაძლებლობებს, რომლებსაც ციფრული ვერსიები ვერ ანაცვლებს – თამაშის მეგობრისთვის თხოვება, მეორადი გაყიდვები და ონლაინ მაღაზიებისგან დამოუკიდებელი კოლექციების შექმნა. კრიტიკოსები, მათ შორის ცნობილი დეველოპერი ჰიდეო კოჯიმა, აღნიშნავენ, რომ ციფრული შენაძენი რეალურად ლიცენზიაა და არა მუდმივი საკუთრება.
ეს აჩენს შიშებს თამაშების ისტორიის შენარჩუნებასთან დაკავშირებით, რასაც Sony-ს მიერ ძველი პლატფორმების (PS3, PS Vita) ციფრული მაღაზიების დახურვის გეგმებიც ამძაფრებს. ექსპერტების აზრით, ათწლეულების შემდეგ კონკრეტულ თამაშებზე წვდომის უზრუნველსაყოფად ფიზიკური მედია კვლავ ყველაზე საიმედო გზაა, რადგან ონლაინ სერვისები და სალიცენზიო შეთანხმებები ნებისმიერ დროს შეიძლება შეიცვალოს ან გაუქმდეს.
მართალია, Microsoft და Nintendo ჯერ კიდევ სთავაზობენ მომხმარებლებს ფიზიკურ თამაშებს, მაგრამ ციფრული გაყიდვები მათთანაც სულ უფრო დომინანტური ხდება. ამ ტენდენციას გამოეხმაურა Rockstar-იც, როდესაც Grand Theft Auto VI ტრადიციული დისკის ნაცვლად მხოლოდ ჩამოსატვირთი კოდით გამოუშვა. იმ ფონზე, როდესაც სულ უფრო მეტი გამომცემელი ირჩევს ციფრულ დისტრიბუციას, სრულიად შესაძლებელია, რომ PlayStation 6 გახდეს Sony-ის პირველი კონსოლი, რომელსაც დისკის წამკითხავი საერთოდ არ ექნება.
წყარო: Design Taxi
