თამაშების დეველოპერი ჯეიმს მიურჰედი, რომელსაც თანამედროვე, მაღალბიუჯეტიან პროექტებზე (Warped Kart Racers, Mafia: The Old Country) მუშაობის დიდი გამოცდილება აქვს, ახლა სრულიად განსხვავებულ მიმართულებას ირჩევს. მისი ახალი სოლო პროექტი, Grease Trap ’99, რეტრო სტილით შთაგონებული საშინელებათა თამაშია, რომელიც ორიგინალი PlayStation-ის (PS1) ვიზუალსა და სპეციფიკურ შეზღუდვებს იმეორებს.
მიუხედავად იმისა, რომ მიურჰედის პირველი კონსოლი ძველი PlayStation იყო, ის ამბობს, რომ მისი არჩევანი მხოლოდ ნოსტალგიით არ არის განპირობებული. ადრეული 3D ერისა და დაბალპოლიგონიანი მოდელების ვიზუალი უკვე დამოუკიდებელ ესთეტიკად იქცა, რომელიც თანაბრად იზიდავს როგორც ძველ მოთამაშეებს, ისე ახალ თაობას, რომელიც ამ კონსოლების პერიოდში არც კი დაბადებულა.
უნივერსიტეტში დისერტაციაზე მუშაობისას მიურჰედი იკვლევდა კავშირს ნოსტალგიასა და უცნაურობის/შიშის შეგრძნებას (uncanniness) შორის. მისი აზრით, ეს ორი ემოცია ერთმანეთში მარტივად გადადის, რადგან ორივე ნაცნობ და კომფორტულ ნივთებზეა დაფუძნებული. ამიტომაც მიაჩნია, რომ PS1-ის სტილის გრაფიკა, რომელიც ბევრისთვის ნოსტალგიურია, იდეალურად ერწყმის საშინელებათა ჟანრს.
თამაშის მოქმედება ბრიტანულ სწრაფი კვების ობიექტში, ე. წ. ჩიპიში ვითარდება. შეზღუდული სივრცე დეველოპერს საშუალებას აძლევს, ზუსტად აკონტროლოს გარემო და შექმნას დეტალური დაბალპოლიგონიანი ობიექტები – იქნება ეს შესაწვავი აპარატები, მენიუ შემწვარი პიცით თუ კუთხეში დაკიდებული ძველი CRT ტელევიზორი. ასეთი კონტროლირებადი გარემო საუკეთესოა ჰორორისთვის, რადგან დეტალების მცირედი შეცვლით საშიში ატმოსფეროს შექმნა ბევრად მარტივია.
გარდა ესთეტიკისა, დაბალპოლიგონიან ვიზუალს სოლო დეველოპერისთვის პრაქტიკული დანიშნულებაც აქვს. მოდელებისა და ტექსტურების შექმნა ამ სტილში გაცილებით სწრაფია და სისტემაზეც მარტივად ეშვება. თუმცა მიურჰედი ხაზს უსვამს, რომ კარგი PS1 ტექსტურების შექმნას მაინც სჭირდება შესაბამისი ცოდნა და მხოლოდ ფოტოების პიქსელიზაცია არ არის საკმარისი.
პროექტის შესაქმნელად ავტორი ძრავ Unity-ს იყენებს. მას უნივერსიტეტიდან მოყოლებული დიდი გამოცდილება აქვს ამ სისტემასთან და ურჩევნია ის Unreal-ს (რომელიც ერთი ადამიანის მცირე პროექტისთვის ზედმეტად რთულია) ან Godot-ს, რადგან Unity-ში უკვე შექმნილი აქვს საკუთარი ინსტრუმენტები და შეიადერები, რომლებსაც მომავალ პროექტებშიც, მაგალითად მის მეორე დაგეგმილ თამაშში Highland Trip, აქტიურად გამოიყენებს.
წყარო: BBC
