დღევანდელი ტექნოლოგიური ლიდერები – OpenAI-ის ხელმძღვანელით დაწყებული და Microsoft AI-ის დირექტორით დამთავრებული – თანხმდებიან, რომ ხელოვნური ინტელექტის ეპოქაში ბიზნესში წარმატების მისაღწევად კრეატიულობა და კრეატიული კითხვების დასმის უნარი ყველაზე მნიშვნელოვანია. თუმცა Accenture Song-ის ახალი კვლევა, სახელწოდებით „გამოყენებითი კრეატიულობა და როგორ ვმართოთ ის“, აჩვენებს, რომ კომპანიები ამ ახალ რეალობას სათანადოდ არ ხვდებიან.
14 ქვეყნის 1,725 აღმასრულებელ დირექტორზე დაკვირვებამ და ისეთი კომპანიების ლიდერებთან ინტერვიუებმა, როგორებიცაა Ikea და Lego, გამოავლინა, რომ მიუხედავად ლიდერების 81%-ის მტკიცებისა, თითქოს მათ ორგანიზაციებს კრეატიული იდეების გენერირება შეუძლიათ, მხოლოდ 16% ახერხებს ამ იდეების რეალურ, ზრდაზე ორიენტირებულ ინიციატივებად ქცევას. თუმცა სწორედ ეს 16% აღწევს საუკეთესო შედეგებს შემოსავლების, თანამშრომელთა ჩართულობისა და მომხმარებლებთან ურთიერთობის კუთხით.
„დიზაინ ფიქრი“ მიდის, „გამოყენებითი კრეატიულობა“ მოდის
ციფრული ტრანსფორმაციის ადრეულ წლებში პოპულარული იყო „დიზაინ ფიქრის“ (Design thinking) კონცეფცია, რომელიც ამტკიცებდა, რომ ნებისმიერ ადამიანს შეეძლო დიზაინერივით აზროვნება. დღეს ეს მიდგომა აქტუალობას კარგავს და მას „გამოყენებითი კრეატიულობა“ ანაცვლებს.
Accenture Song-ის ექსპერტების აზრით, „დიზაინ ფიქრის“ მთავარი შეცდომა ის იყო, რომ კრეატიულობას სუბიექტურ, ყველასთვის ხელმისაწვდომ თვისებად განიხილავდა და არა კონკრეტულ უნარად, რომელიც ტრენინგსა და გამოცდილებას მოითხოვს. AI-ის ეპოქაში ეს პრობლემა განსაკუთრებით მწვავედ გამოჩნდა. დღეს ინჟინრებს შეუძლიათ ვიზუალური მასალის შექმნა, ხოლო დიზაინერებს – კოდის დაწერა. როდესაც ტექნიკური უნარები ყველასთვის თანაბრად ხელმისაწვდომი ხდება, ბრენდების გადასარჩენად და კონკურენტული უპირატესობის მოსაპოვებლად სწორედ ის პროფესიონალი კრეატორები ხდებიან საჭირო, რომლებსაც ხაზოვანი და ლოგიკური ჩარჩოების მიღმა ხედვა შეუძლიათ.
კვლევის კიდევ ერთი საინტერესო მიგნება ის არის, რომ კომპანიებში კრეატიულ იდეებს ხშირად მაღალ რისკად აღიქვამენ. ხელმძღვანელების 83% აცნობიერებს კრეატიულობის მნიშვნელობას, თუმცა 63% ამბობს, რომ იცნობს კოლეგებს, რომლებიც ინოვაციური მიდგომების გამო დაისაჯნენ ან დაწინაურება ვერ შეძლეს. 59% კი მიიჩნევს, რომ სტატუს-კვოსთან შეწინააღმდეგება ადამიანს „რთულ თანამშრომლად“ აქცევს. შესაბამისად, მთავარი პრობლემა არა კრეატიულობის გაუგებრობა, არამედ მისი გამოყენების უუნარობაა.
ლიდერობის 3-ეტაპიანი სახელმძღვანელო
კომპანიებმა, რომლებიც წარმატებით იყენებენ კრეატიულობას (Ikea, Lego, Rivian), ეს წარმატება სამი ძირითადი საყრდენით მიიღეს:
-
ექსპერტიზა: ეს ნიშნავს ხელმძღვანელ პოზიციებზე კრეატიული წარსულის მქონე პროფესიონალების დანიშვნას. მიუხედავად იმისა, რომ სტივ ჯობსისა თუ ფილ ნაიტის (Nike-ის დამფუძნებელი) მსგავსი ისტორიული ლიდერები კრეატიული სფეროდან მოდიოდნენ, დღეს ტოპ კომპანიების საბჭოს წევრების მხოლოდ 9%-ს აქვს მსგავსი გამოცდილება.
-
მზაობა (Commitment): ლიდერებმა ორგანიზაციაში კრეატიულობის ბარიერები უნდა მოხსნან და შექმნან კულტურა, სადაც თანამშრომლებს იდეების გაზიარებისა და პრეზენტაციის თავისუფალი სივრცე ექნებათ.
-
სტრუქტურა: კომპანიას უნდა ჰქონდეს მკაფიო სისტემა, რომელიც კრეატიულ იდეებს პრაქტიკულ გადაწყვეტილებებად და მოქმედებებად აქცევს. მაგალითად, Ikea იყენებს AI-სიმულაციებს იდეების სრულად დასატესტად, ხოლო ბანკი HSBC სპეციალურ დროსა და დაფინანსებას გამოყოფს ექსპერიმენტებისთვის, რათა ბიუროკრატიამ იდეები არ შეაჩეროს.
ორგანიზაციები, რომლებიც ამ სამივე პრინციპს იცავენ, გაცილებით მარტივად უმკლავდებიან AI ტრანსფორმაციას და კონკურენტებს საგრძნობლად უსწრებენ შემოსავლების, თანამშრომელთა ჩართულობისა და ბრენდის ღირებულების ზრდაში. როგორც კვლევის ავტორები აღნიშნავენ, მათი მთავარი მიზანია, ბიზნესმა კრეატიულობა არა უბრალოდ „კარგ დანამატად“, არამედ სასიცოცხლო აუცილებლობად აღიქვას.
წყარო: Fast Company
