Google DeepMind ჰოლივუდში ინაცვლებს და დამოუკიდებელ კინოსტუდიასთან, A24-თან იწყებს თანამშრომლობას. ამ პარტნიორობის მთავარი მიზანია შეისწავლოს, თუ როგორ შეუძლია ხელოვნურ ინტელექტს კინოწარმოების პროცესის მხარდაჭერა ისე, რომ ის უშუალოდ შემოქმედებითი პროცესის დამხმარე ძალად იქცეს და არა მთავარ მოქმედ პირად.
DeepMind-მა A24-ში დაახლოებით 75 მილიონი აშშ დოლარის ინვესტიცია განახორციელა, რაც კინოსტუდიაში კომპანიის პირველი პირდაპირი წილობრივი მონაწილეობაა. გარიგების შედეგად A24-ის საერთო ღირებულება დაახლოებით 3.5 მილიარდ დოლარად შეფასდა. მრავალწლიანი, არაექსკლუზიური შეთანხმება ფოკუსირებული იქნება AI ხელსაწყოების შექმნაზე, რომლებიც პროდუქციას, მონტაჟს, ვიზუალურ ეფექტებსა და დისტრიბუციას გაამარტივებს.
პროექტი არ ისახავს მიზნად სცენარისტების, რეჟისორების ან არტისტების ჩანაცვლებას. პირიქით, A24-ის კინემატოგრაფისტები უშუალოდ ჩაერთვებიან განვითარების ეტაპებზე და პროგრამული უზრუნველყოფა მათი უკუკავშირის საფუძველზე, შემოქმედებითი საჭიროებების მიხედვით ჩამოყალიბდება.
მნიშვნელოვანია, რომ შეთანხმება ჰოლივუდის ერთ-ერთ ყველაზე მწვავე პრობლემასა და შიშსაც აგვარებს. A24 სრულ შემოქმედებით კონტროლს ინარჩუნებს და რაც მთავარია, მისი ფილმების ბიბლიოთეკა Google-ის AI მოდელების დასატრენინგებლად არ გამოიყენება. ეს მიდგომა საავტორო უფლებებისა და მონაცემთა გამოყენების ირგვლივ არსებულ წუხილს აქარწყლებს, რაც 2023 წლის ჰოლივუდის მასშტაბური გაფიცვებისა და შრომითი დავების შემდეგ განსაკუთრებით სენსიტიურ თემად იქცა.
A24 საზოგადოებისთვის კარგადაა ცნობილი ისეთი საავტორო და გამორჩეული პროექტებით, როგორებიცაა „Everything Everywhere All at Once“, „Moonlight“, „Civil War“, „The Drama“ და „Backrooms“. თავის მხრივ, Google DeepMind აქტიურად ავითარებს გენერაციულ ტექნოლოგიებს, მათ შორის ვიდეოს გენერირების მოდელ Veo-ს, რომელსაც ტექსტური ბრძანებიდან ვიდეოკადრების შექმნა შეუძლია.
ეს გარიგება ჰოლივუდში AI ტექნოლოგიების მზარდ ტენდენციას ეხმიანება, რადგან სხვა სტუდიებიც აქტიურად იკვლევენ წარმოების პროცესში ხელოვნური ინტელექტის ინტეგრირების გზებს. მაგალითად, Netflix-მა ცოტა ხნის წინ ბენ აფლეკის AI სტარტაპი, InterPositive შეიძინა, Lionsgate-მა Runway AI-სთან თანამშრომლობა გააფართოვა, ხოლო ცნობილი რეჟისორი მარტინ სკორსეზე, გავრცელებული ინფორმაციით, ხელოვნური ინტელექტის დახმარებით შექმნილ სთორიბორდის (storyboarding) ინსტრუმენტებს უკვე ტესტავს.
წყარო: Design Taxi
