რატომ აბრუნებენ ტექნოლოგიური გიგანტები საყვარელ თილისმებს?

მსოფლიოს უმსხვილესი ბრენდები, მათ შორის წამყვანი ტექნოლოგიური კომპანიები, სულ უფრო ხშირად მიმართავენ ძველ სტრატეგიას – ქმნიან საყვარელ და მეგობრულ ანიმაციურ თილისმებს (მასკოტებს). მარკეტინგის ექსპერტების აზრით, ეს ტაქტიკა ბრენდს უფრო „ადამიანურს“ ხდის და მომხმარებლებთან მჭიდრო ემოციურ კავშირს ამყარებს.

ვინ დააბრუნა თილისმები?

• Apple: მარტში კომპანიამ ახალი ლეპტოპის სარეკლამო კამპანიისთვის ცისფერ-თეთრი პერსონაჟი (დიდი თავით) წარადგინა, რომელსაც ინტერნეტსივრცეში არაოფიციალურად „Little Finder Guy“ შეარქვეს.

• Microsoft: წლების წინ დაწუნებული კლიპის (Clippy) შემდეგ, კომპანიამ ხელოვნური ინტელექტის ასისტენტისთვის (Copilot) ახალი პერსონაჟი – Mico შექმნა. ეს არის მოღიმარი ფიგურა, რომელიც Microsoft-ის თქმით, AI-სთან კომუნიკაციას უფრო თბილსა და ბუნებრივს ხდის.

• Google: წამოიწყო ინიციატივა, რომელიც მომხმარებელს Android-ის მწვანე რობოტის პერსონალიზაციის საშუალებას აძლევს. ატვირთული სელფის მიხედვით, მასკოტი თქვენს ტანსაცმელსა და ვარცხნილობას ირგებს.

• Mozilla Firefox: წელს კომპანიამ თავისი ლოგო სრულფასოვან თილისმად, სახელად Kit აქცია, რათა კონკურენტების (Chrome, Safari, Edge) „ცივი“ ლოგოებისგან გამოირჩეოდეს.

• Duolingo: მწვანე ბუმ, სახელად Duo-მ, TikTok-სა და Instagram-ზე 20 მილიონზე მეტი გამომწერი შეაგროვა. ის უბრალო თილისმიდან დამოუკიდებელ პერსონაჟად იქცა, რომელთანაც ადამიანები ემოციურად არიან დაკავშირებულნი.

• Reddit და Penguin Books: Reddit-მა თავისი უცხოპლანეტელი (Snoo) უფრო ანიმაციური და ემოციური გახადა, გამომცემლობა Penguin-მა კი 1935 წლიდან არსებულ პინგვინის ლოგოს ხელით ნახატი ილუსტრაციებით ახალი სიცოცხლე შესძინა.

თილისმები ბიზნესისთვის საკმაოდ მოგებიანია. 2019 წლის კვლევის თანახმად, ბრენდებს, რომლებიც მასკოტებს იყენებენ, ბაზრის წილის გაზრდის 37%-ით მეტი შანსი აქვთ. მარკეტინგის პროფესორის, ენთონი პატერსონის განმარტებით, თილისმა „ცივ და უპიროვნო კომპანიას ხმას, პიროვნებასა და სახეს სძენს“.

გარდა ამისა, ეს სუფთა ფსიქოლოგიური ტრიუკია: ანიმაციური გმირების დიდი თავი და დიდი თვალები ადამიანებში ბავშვის მიმართ არსებულ ბუნებრივ, ინსტინქტურ სითბოს აღვიძებს.

მიუხედავად მარკეტინგული წარმატებისა, ეს ტენდენცია ბევრში ეჭვს იწვევს. ფსიქოლოგიისა და ტექნოლოგიების ექსპერტი ნატალი ნაჰაი აღნიშნავს, რომ მასკოტების დაბრუნება ტექნოლოგიური გიგანტების მიმართ ნდობის გლობალურ კრიზისს ემთხვევა.

„ბევრი კომპანია ტექნოლოგიური დიქტატორის სახელით სარგებლობს. რა შეიძლება იყოს ამის გადასაფარად იმაზე უკეთესი, ვიდრე საყვარელი, ანთროპომორფული თილისმის შექმნა?“ – ამბობს ნაჰაი.

ექსპერტებს განსაკუთრებით აშფოთებთ ხელოვნური ინტელექტისა და მასკოტების შერწყმა. პერსონალიზებული თილისმა, რომელიც მომხმარებელს პირადად ესაუბრება და კონკრეტული ქმედებებისკენ (მათ შორის შესყიდვებისკენ) უბიძგებს, მანიპულაციურია. უფროსი თაობისგან განსხვავებით, რომელიც მარკეტინგულ ხრიკებს მეტი ცინიზმით უყურებს, უმცროსი თაობა მსგავსი სტრატეგიების წინაშე განსაკუთრებით მოწყვლადი და მიმნდობი რჩება.

წყარო: BBC